Бул саякат өзүнө тоолордун кооздугун, жеңил экстримди жана тынч эс алууну камтыйт. Маршрутка Асман көпүрөсү, Көгүчкөн шаркыратмасы, асма жол, зиплайн жана соңунда Архар борборундагы эс алуу кирет.

Асман көпүрөсү — капчыгайдын үстү менен өтчү жол
Чуңкурчак капчыгайындагы Асман көпүрөсү тоо дарыясынан болжол менен 60 метр бийиктикте жайгашкан. Ал чыгып турган эки асканы бириктирген конструкция. Алгачкы кадамдардан тартып эле укмуштуудай көрүнүштөр ачылат, капчыгай, өрөөн жана ылдый жактагы тоонун бети көз жоосун алат.

Көпүрөдөн өтүп баратып, кооз сүрөттөрдү тартып алууга болот, ал эми көпүрөдөн кийин панорама жайгашкан. Бул жерден бүт капчыгай көрүнүп, сүрөткө түшүүгө эң мыкты жай боло алат. Аянтчага отургучтар орнотулган, эс алып отуруп, тоолордун кооздугунан ырахат алсаңыз болот.

Жазында Чуңкурчак өзгөчө кооз, тоо беттери көк шиберге боёлуп, гүлдөр ачылып, айлана жандуу жана жаркыраган көрүнүшкө ээ болот. Бул маалда табияттын демин сезип, сейилдөөнү каалагандар ушул жерге көп келишет.

Көгүчкөн шаркыратмасы — кубат берген жер жана туристтердин сүйүктүү жайы
Көпүрөдөн анча алыс эмес жерде Көгүчкөн шаркыратмасы жайгашкан, ал – Чуңкурчактагы эң популярдуу сүрөткө түшүүчү жайлардын бири. Ага жыгач тепкич аркылуу барууга болот.

Шаркыратма аскалардын арасында жашынып, айланасы жашылга бөлөнгөндүктөн, андагы тартылган сүрөттөр өзгөчө кооз чыгат. Бул жерден токтоп, суунун шуулдаган үнүн угуп, дарыянын жээги менен басып, салкындыкты жана тынчтыкты сезгиң келет.

Чуңкурчак капчыгайы байыркыдан бери келе жаткан сырды сактайт деп айтышат. Илгери бул жерде Чуңкур аттуу кыз жашаган экен, ал боорукер жана кайраттуу болуп, адамдарга жардам берип, тоодогу ар бир жолду билчү дешет. Катуу кургакчылык болгондо кыз ыйык шаркыратмага барып, рухтардан сууну кайтарып берүүнү суранган. Тоо руху өзүн курмандыкка берүүгө даяр адамдан гана куткаруу келерин айткан. Чуңкур буга макул болгондон кийин капчыгайга кайрадан тунук суу ага баштап, эл аман калган экен. Ал эми кыз жоголуп, тоо булагына айланган экен. Анын эр жүрөктүүлүгүнүн жана жакшылыгынын урматына капчыгай Чуңкурчак деп аталып калган.

Асма жол — капчыгайга бийиктен көз чаптыруу
Чуңкурчактагы эң кызыктуу курулуштардын бири — асма жол. Бул капчыгайдын үстүнө чыгып, тоо-ойдуңдарды бийиктиктен көрүүгө эң жакшы мүмкүнчүлүк. Бир жолку түшүүнүн баасы 400 сом.

Асма жол менен көтөрүлүп баратканда тоо массивдери, дарыя жана жашыл беттер кеңири көрүнөт. Жазында жана жайында табият өзгөчө жаркырап, ажайып көрүнгөндүктөн, бул сапар өзүнчө ырахат тартуулайт.

Зиплайн — драйв, ылдамдык жана эмоция
Чуңкурчактагы зиплайн экстримди жактыргандар үчүн унутулгус көз ирмемдерди тартуулайт. Бир жолку түшүү — 600 сом.

Капчыгайдын үстүнөн учуу күчтүү эмоция тартуулайт: бетке соккон шамал, бийиктик, ылдамдык жана эркиндик сезими. Маршрут капчыгайдын эң кооз жерлеринин үстү менен өтөт, ошондуктан ал көпкө чейин эсте калат.

Капчыгайдын жүрөгүндө «Супара» этно-комплекси да бар. Ал – тоолордун арасында жайгашкан жайлуу мейкиндик, анда кыргыздын салттуу атмосферасын сезип, шаардагы ызы-чуудан эс алууга болот. Бул жерде улуттук стилде жасалгаланган этно-кафе бар, ичинде жылуу маанай, улуттук шырдактар, жергиликтүү ашкананын тамактары жана тоолорго ачылган көрүнүш бар. Узакка калууну каалагандар үчүн комплексте суткасына ижарага берилүүчү коттедж-үйлөр бар, жылуу, жыгачтан салынган жана ыңгайлуу эс алуу үчүн толук жабдылган.

Коноктор үчүн аттарды ижарага алып, айлананы кыдырып сейилдөөгө да шарт түзүлгөн, бул Чуңкурчакты өзгөчө маанайда сезүүнүн эң жакшы жолдорунун бири. Бул жерде сүрөткө түшүүгө жана эс алууга ылайыктуу чоң жыгач селкинчектер орнотулган, ал эми балдар үчүн тоонун таза абасында коопсуз ойной турган оюн аянтчасы бар.

«Супара» — тынчтык, көз жоосун алган көрүнүштөр жана табият менен этностук маданияттын айкалышы болуп, эс алуу үчүн идеалдуу атмосфера жаратат.

Чуңкурчак жайында жана кышында
Жайында бул жерде сейилдөөнү, табиятты жана жеңил экстримди айкалыштырууга болот. Жакын жерде жайылып жүргөн аттарды көрүүгө болот, туристтер көп учурда аларга тамак берип коюшат, айрыкча балдар муну абдан жактырышат.

Кышында Чуңкурчак популярдуу тоо лыжа курортуна айланат. Бул жерде лыжа, сноуборд жана тюбинг тебишет. Эс алуу үчүн керектүү жабдуулардын баарын жол боюнан ижарага алууга болот, кышында трассанын бойлой ижарага бере турган дүкөндөр иштеп, эс алууга даярдануу кыйынчылык жаратпайт.

Архар эс алуу борбору
Капчыгайдан анча алыс эмес жерде Архар эс алуу борбору жайгашкан, ал сейилдегенден кийин эс алууга ыңгайлуу жай. Кирүү акысы 300 сом, бардык зоналарга кирүүгө мүмкүнчүлүк берет.

Аймак көрктөндүрүлгөн, сейилдөөгө арналган жолдор, көрүү аянтчалары жана жайлуу эс алуу зоналары бар. Кафе иштейт, тоолорго көрүнүш ачылган жерде түшкү тамак ичип же жөн гана чай ичип отурсаңыз болот.

Аймакта чакан шаркыратма жана бир нече фотозона бар. Тепкичтүү панорама көңүлдү өзгөчө бурат, анын эң жогорку чекитинен Асман көпүрөсүн көрүнөт. Бул сүрөткө жана видеого түшүү үчүн эң популярдуу жайлардын бири. Мындан тышкары, майрам күндөрү борбор ар түрдүү жасалгалар менен кооздолуп, жомоктогудай майрамдык маанай тартуулайт.

Архар аймактагы кооз жерлер менен мыкты айкалышат, табият, жеңил укмуштуу окуялар, экстрим жана ыңгайлуу эс алуу бир жерде топтолгон.

Мария Ермеева