Министрлер кабинети жаныбарлар дүйнөсүнө зыян келтиргендерге айып пулдардын өлчөмүн жогорулатуу жөнүндө токтом кабыл алды. Бул тууралуу Жаратылыш ресурстары, экология жана техникалык көзөмөл министрлиги билдирди.

Жаңы ченемдерге ылайык, тоо текени мыйзамсыз атуу үчүн айып пул 300 миң сомду, элик үчүн 100 миң сомду түзөт. Ак жана кара илегилектерге зыян келтиргендиги үчүн 30 миң сом өлчөмүндө айып пул белгиленди.

Документте каражаттарды бөлүштүрүү механизми да каралган. Өндүрүлгөн каражаттардын бир бөлүгү экологиялык укук бузууларды аныктаган жана аларды тариздөөгө көмөктөшкөн адамдарды материалдык жактан сыйлоого жумшалат.

Бул чаралар биологиялык ар түрдүүлүктү сактоо жана браконьерлик менен күрөшүү максатында кабыл алынган.