Кыргыз Республикасынын мурдагы башкы прокурору Аида Салянова билдиргендей, Камила Дүйшөбаевадын өлтүрүлгөнүнө 11 жыл өткөндөн кийин бул кылмыштын бети ачылды. Бул тууралуу ал өзүнүн Facebook баракчасына жазган.

«Маалыматтарга караганда, Камила Дүйшөбаевадын өлүмү боюнча иш ачылды. Өз убагында мени каралоо максатында жаш кыздын өлүмүн саясат менен байланыштырышкан, ошонун айынан кылмыш ачылбай калган. Бул окуя Айсулуу Мукашевадын өлүмү менен кандайча байланыштуу?» — деп жазган Салянова.

Ал жакын арада түз эфирге чыгып, толук маалымат берүүгө убада кылган. Бирок кийинки постунда укук коргоо органдары иштин чоо-жайын ачыктабай турууну суранышкандыктан, бардык маалыматты бир нече жуманын ичинде бөлүшөрүн билдирген.

Эске салсак, милиция кызматкерлери 17 жаштагы Айсулуу Мукашевадын сөөгүн Ысык-Көл облусунун Барскоон айылынан табышкан. Ал 27-сентябрда дайынсыз кеткен эле. 29-сентябрда укук коргоо органдары кылмышка шектүү катары 41 жаштагы А.А.К. аттуу адамды кармашкан. Тергөө маалында ал кызды зордуктап, андан кийин өлтүргөнүн моюнуна алган.

2014-жылдын 10-мартында 19 жаштагы Камила Дүйшөбаева белгисиз жагдайларда өлтүрүлгөн. Анын сөөгүн бир жума өткөн соң Байтик айылындагы көрүстөндөн табышкан. Кыз өзүнүн шарфы менен муунтулуп өлтүрүлгөнү аныкталган. Өз жанын кыйган деген божомолду тергөөчүлөр дароо эле четке каккан.

Бул окуя коомчулукта чоң резонанс жараткан, анткени маалымат каражаттарында ошол кездеги Кыргызстандын мурдагы башкы прокурору Аида Салянова менен туугандык байланышы бар — анын таякеси Калыбек Саляновдун аты да аталган.