Кыргызстандын футбол боюнча 20 жашка чейинки жаштар курамасынын башкы машыктыруучусу Сергий Пучков кызматтан бошотулду. Бул тууралуу Кыргыз футбол биримдигинен билдиришти.
Анын кызматтан алынышына жаштар курамасынын Азия кубогунда көрсөткөн ийгиликсиз оюндары себеп болгон. Бул мелдеште курама тайпадагы үч беттешинде тең ири эсеп менен жеңилген. Команда Австралияга 1:5, Кытайга 2:5 жана Катарга 0:4 эсебинде утулуп, Азия кубогунан четтеген.
Пучков менен бирге машыктыруучулар штабы дагы кызматынан бошотулду.
Эскерте кетсек, Сергий Пучков жаштар курамасынын машыктыруучусу болуп 2024-жылы декабрда дайындалган.
