Талас облусундагы Киров суу сактагычына салына турган “Бала-Саруу” ГЭСинин биринчи агрегатынын курулуш иштери 1-августта башталат. Бул тууралуу президенттин Таластагы өкүлчүлүгүнөн билдиришти.
Аталган ГЭСтин курулуш иштерин “Чакан ГЭС” АККсы жүргүзөт. Анын курулушуна 1 млрд 950 млн сом кетери болжолдонууда. Өкүлчүлүктөн белгилешкендей, учурда Каржы министрлиги аталган каражатты “Чакан ГЭС” АККсы эсебине которуп берген.
“Бала-Саруу” ГЭСине кубаттуулугу 25 мегаваттка жеткен үч генератор орнотулат. Ал жылына орточо 92 млн кВт/саат электр энергиясын иштеп чыгат. ГЭСтин биринчи агрегаты ушул жылдын 22-декабрында ишке кирет.
Белгилей кетсек, Киров суу сактагычынын курулушу 1965-жылы башталып, 1975-жылы аяктаган. Анда топтолгон сууну сугат иштери үчүн Талас облусунун тургундары жана коңшу Казакстан колдонуп келет.
Буга чейин президент Садыр Жапаров 2021-жылдын 29-августундаТалас облусуна болгон иш сапарынын алкагында Киров суу сактагычында «Бала-Саруу» жаңы ГЭСинин курулушуна капсула салгандыгы маалымдалган.
