Өкмөт башчынын орун басары Эдил Байсалов билим берүү системасына олуттуу реформа керек экенин айтып, «алсыз мугалимдерди алмаштыруу шарт» деген оюн билдирди. Бул тууралуу ал «Номад» телеканалына берген маегинде айтты.

Анын айтымында, өлкөдө көп жылдар бою жаңы имараттарды курууга басым жасалып, билимдин сапаты көңүл сыртында калып келген. Байсалов Кыргызстанда «800гө жакын ашыкча мектеп салынганын», кээ бир райондордо алар жарым-жартылай бош турганын белгиледи.

Байсалов ал үчүн маанилүүсү имарат эмес, билим берүү процессинин өзү экенин белгиледи.

«Мага баары бир, кааласаңар сарайда деле окугула. Мени кызыктырганы – мугалим менен окуучунун ортосунда эмне болуп жатканы», — деди ал.

Байсалов «мыкты советтик мектеп» тууралуу айтылгандарды да сынга алып, билим берүү үч жыл сайын жаңыланып турушу керек экенин айтты.

Ошондой эле ал билим берүү министринен мугалимдерди массалык аттестациялоону талап кылганын билдирди. Анын пикиринде, «15–20% эң алсыз мугалимди» алмаштыруу керек.

«Көчөдөн деле адамдарды, мисалы, ошол эле журналисттерди алып келип, айына 50–60 миң сом айлык берген жакшы», — деди Байсалов.

Ал кадрларды, окуу программаларын жана методологияны жаңылоо реформага сөзсүз кириши керек экенин кошумчалады.