Бишкек шаарынын мэри Айбек Жунушалиев Кытайдын «Yutong» компаниясынын автобустарынын бирин видеого тартып көрсөттү. Ал 12 метр узундуктагы бул автобустар үч эшиги бар, кондиционер менен жабдылган жана 28 орундуу экенин билдирди.

Маалым болгондой, шаар башчысы азыр Кытайда болуп, «Yutong» заводунун иши менен таанышууда. Дал ушул жерде аталган автобустар чыгарылат. Айбек Жунушалиев Бишкекке ушундай 95 автобусту алып келүү боюнча келишимге жетишти.

Заводго болгон бул сапардын максаты — «Yutong» компаниясынын өндүрүш процесстерин жана алдыңкы технологияларын үйрөнүү, ошондой эле Бишкектин транспорттук инфраструктурасын жаңылоо жана өнүктүрүү багытындагы кызматташуу мүмкүнчүлүктөрүн баалоо болуп саналат. Айрыкча көңүл экологиялык жактан таза транспортко бурулган. Бул болсо борбор калаанын экологиялык абалын жакшыртуу жана тургундарды ташууну сапаттуу деңгээлге көтөрүү боюнча приоритеттерине шайкеш келет.