Бишкек шаарынын Калыс-Ордо-2 конушунда 6 жашар бала иттерге таланып, ооруканага түштү. Бул тууралуу Бишкек ШИИББдин басма сөз кызматы билдирди.

Кечээ, 1-апрелде, саат 17:37 чамасында милиция бөлүмүнө иттер жаш балага кол салганы тууралуу маалымат түшкөн. Окуя болгон жерге барган милиция кызматкерлери 2019-жылы туулган У.А. иттерге таланганын такташкан.

Ошондой эле жабыркаган жаш бала милиция кызматкерлери тарабынан ооруканага жеткирилген. Учурда бала ооруканада дарыгерлердин көзөмөлүндө, анын абалы туруктуу деп бааланууда.

Милиция иликтөөнүн алкагында иттердин ээси аныкталганын, ал эми жаныбарлар атылып, жок кылынганын маалымдады. Бул окуя катталып, тергөөгө чейинки текшерүү иштери башталды.