Бишкек шаарындагы мектептердин 1-2-класстарына балдарды кабыл алуу иштери уланууда. Бул тууралуу мэрдин орун басары Виктория Мозгачева маалымат жыйынында билдирди.

Анын айтымында, бүгүнкү күндө борбор калаада 1840 бош орун бар, ал эми жеңилдетилген тизмеге кирген балдар үчүн кошумча 1937 орун каралган.

“6-7 жаштагы балдар мектепке барат. Ата-энелерге онлайн каттоо боюнча түшүндүрүү иштери жүрүп жатат. 6 жаштагылар — 1-класска, 7 жаштагылар — 2-класска кабыл алынат. Бир дагы бала мектепке алынбай калбайт”, — деп белгиледи Мозгачева.

Мэриянын маалыматына караганда, жыл сайын шаарда окуучулардын саны 10-12 миңге көбөйүүдө. Учурда жалпы окуучулардын саны 236 миңге жетти. Бул көрсөткүч шаар аймагынын кеңейип жатканы менен да байланыштуу.