Орусиянын президенти Владимир Путин бүгүн, шейшемби күнү, Бишкектеги мамлекеттик сапарынын алкагында Кыргызстандын президенти Садыр Жапаров менен жекече жолугушат. Бул тууралуу Орусия президентинин жардамчысы Юрий Ушаков билдирип, сапар Садыр Жапаровдун чакыруусу менен уюштурулганын айтты.

Ушаковдун айтымында, Путиндин иш сапары 25-ноябрдын кечинде башталат. Ал эми 27-ноябрда Бишкекте ЖККУнун Коопсуздук кеңешинин жыйыны өтөт.

Кеңейтилген форматтагы жолугушууда тараптар соода-экономикалык жана энергетикалык кызматташтыкты, билим берүү, саламаттык сактоо жана миграция маселелерин талкуулашат.

Путиндин визити жана ЖККУ жыйынына байланыштуу 25–27-ноябрда Бишкек жана Чүй облусунда айрым көчөлөр убактылуу жабылат.

Бүгүндөн тарта мектептер 1-декабрга чейин онлайн окутат. ЖОЖдор да 25–27-ноябрда дистанциялык форматка өтүшөт.