Бишкекте миграция эрежелерин бузган жана улуттук валютаны кордогон делип чет өлкөлүк жаран кармалды. Бул тууралуу Бишкек ИИББдин басма сөз кызматы маалымдады.

Экстремизмге жана мыйзамсыз миграцияга каршы күрөшүү кызматы жана Ленин райондук милициясынын кызматкерлери соцтармактарда кеңири талкууланып жараткан видеодогу чет өлкөлүк жарандын өздүгүн аныкташкан. Ал С.А. аттуу 23 жаштагы чет өлкөлүк жаран болуп чыккан.

“Видеодогу кадрларда эркек киши Кыргызстандын улуттук валютасын айрып, мамлекеттин символдоруна жана коомдук адеп-ахлак нормаларына карата сыйлабастык көрсөтүп жаткандыгы көрүнөт”,- деп айтылат маалыматта.

Тергөөнүн жүрүшүндө аталган чет элдик жарандын Кыргызстан аймагында мыйзамдуу жүрүүсүн тастыктаган документтери жок экени белгилүү болгон. Мындан улам миграция мыйзамдарын бузуу фактысы боюнча чет өлкөлүк жаранды өлкө аймагынан чыгаруу иштери жүргүзүлүп жатат.