Евразия экономикалык комиссиясынын (ЕЭК) соода боюнча министри Андрей Слепнев Пакистандын федералдык соода министри Жам Камал Хан менен сүйлөшүүлөрдү өткөрдү. Анын жүрүшүндө тараптар эркин соода аймагын түзүү келечегин талкуулашты.

Жолугушуунун негизги жыйынтыгы – ЕАЭБ менен Пакистандын ортосунда эркин соода келишимин түзүүнүн максатка ылайыктуулугун баалай турган биргелешкен изилдөө тобун ишке киргизүү боюнча макулдашуу болду.

Андрей Слепнев белгилегендей, Биримдикке мүчө өлкөлөр Пакистанды Түштүк Азиядагы келечектүү өнөктөштөрдүн бири катары карашат. Анын айтымында, өз ара сооданын учурдагы динамикасы аны кеңейтүү үчүн чоң мүмкүнчүлүктөр бар экенин далилдейт.

Өз кезегинде Жам Камал Хан эркин соода боюнча мүмкүн болгон келишим Пакистан үчүн жаңы экспорттук мүмкүнчүлүктөрдү гана эмес, ЕАЭБ менен стратегиялык кызматташуу келечегин да ачарын баса белгиледи. Бул жерде кеп, атап айтканда, логистика, энергетика, санариптик соода, өнөр жай жана жеткирүү чынжырларын өнүктүрүү тармактарындагы кызматташтык жөнүндө болуп жатат.