Эми Tunduk тиркемесинен жогорку билим тууралуу дипломдун электрондук форматын алууга болот. Бул тууралуу Агартуу министрлиги кабарлады.

Маалыматка ылайык, алгачкы этапта системага ушул жылы берилген дипломдор тууралуу маалыматтар киргизилди. Демек 2025-жылдын бүтүрүүчүлөрү дипломдорун Tunduk мобилдик тиркемесинин ”Документтер” бөлүмүнөн ала алышат.

Учурда мурдагы жылдары берилген дипломдордун санарип форматын жайгаштыруу иштери жүрүп жатат.

“Эми мамлекеттик органдар жана кызыкдар уюмдар жарандардан кагаз түрүндөгү көчүрмөлөрдү берүүнү талап кылбастан, берилген дипломдор тууралуу маалыматтарды электрондук форматта ыкчам жана ыңгайлуу түрдө ала алышат”,- деп айтылат маалыматта.