Европа реконструкциялоо жана өнүктүрүү банкы (ЕӨБ) Кыргыз Республикасына улуттук электр тармагын масштабдуу модернизациялоо үчүн каржылык топтомду сунуштоодо. Макулдашуу 61,7 млн евро өлчөмүндөгү суверендүү насыяны бөлүүнү карайт, ал 3 млн евро өлчөмүндөгү инвестициялык грант жана техникалык кызматташтык үчүн дагы 3 млн евро каражат менен толукталат.

Каржылоо «Кыргызстандын улуттук электр тармагы» ААКсын өлкөнүн түндүк-чыгышындагы стратегиялык инфраструктуралык долбоорду ишке ашырууда колдоого багытталган. Программанын алкагында Кемин жана Балыкчы шаарларын бириктирген, чыңалуусу 500 кВ жана узундугу 53 километр болгон жаңы электр берүү чубалгысы курулат. Долбоор Балыкчыда кубаттуулугу 500 кВ болгон жаңы заманбап көмөк чордонду курууну да камтыйт.

Масштабдуу инвестициялардын зарылдыгы республиканын энергетикалык активдеринин кескин эскиргени менен шартталган. Банктын маалыматы боюнча, Кыргызстандагы көмөк чордондордун 90%га жакыны 25 жылдан ашык убакыттан бери иштеп жатат, ал эми тармактардагы техникалык жана коммерциялык жоготуулар 14,6%га жетип, эл аралык стандарттардан кыйла ашып түшүүдө. Инфраструктураны жаңыртуу жыл сайын 34 ГВт·саатка чейин электр энергиясын үнөмдөөгө жана парник газдарынын бөлүнүшүн 3,3 миң тоннадан ашыкка кыскартууга мүмкүндүк берет деп күтүлүүдө.

Ички энергия менен камсыздоонун ишенимдүүлүгүн жогорулатуудан жана жаңылануучу энергия булактарын интеграциялоодон тышкары, долбоор өлкөнүн экспорттук дараметин бекемдөөгө багытталган. Тармактык туруктуулукту жакшыртуу жана өткөрүү жөндөмдүүлүгүн жогорулатуу Кыргызстанга таза гидроэлектр энергиясынын ашыкчасын коңшу мамлекеттерге экспорттоого мүмкүнчүлүк берет. 1992-жылдан бери ЕӨБ республиканын туруктуу инфраструктурасына жана жеке секторуна 280 долбоордун алкагында болжол менен 1,15 млрд евро инвестиция салган.