Кыргызстандагы маалыматтардын чын-төгүнүн изилдеген factcheck.kg басылмасынын башкы редактору Болот Темировду сабап кетишти.
Бул тууралуу factcheck.kg басылмасы Фейсбуктагы баракчасына жазып, журналисттин бетинде сокуунун белгилери бар сүрөтүн жарыялаган.
“Бүгүн түштө редакциянын жанынан спорттук дене түзүлүштөгү 3 бала Болот Темировду уруп-согуп, телефонун тартып алышкан”, — деп жазылат анда.
Жакында эле factcheck.kg сайты Бажы кызматынын мурдагы орун басары Райымбек Матраимовдун жубайы Уулкан Тургунованын социалдык тармакка жүктөгөн аксессуарларынын баасын иликтеп чыккан. Мындан көп өтпөй анын сайты хаккердик чабуулга кабылган.
