УКМКнын мурдагы башчысы Камчыбек Ташиев 13-февралда эртең менен республикага кайтып келет. Бул тууралуу анын тарапташы Нургазы Анаркулов социалдык тармактагы баракчасында билдирди.

Анын маалыматына караганда, Ташиевдин чет өлкөдөгү дарылануу курсу толук аяктабаганына карабастан, кайтып келүү чечими өлкөдөгү учурдагы коомдук-саясий кырдаалга байланыштуу кабыл алынган.

Нургазы Анаркулов ошондой эле Камчыбек Ташиевдин жарандарга аэропорттон тосуп алуу боюнча иш-чараларды уюштурбоо өтүнүчү менен кайрылуусун жеткирди.

Эске салсак, буга чейин Камчыбек Ташиев жүрөгүнө операция жасатуу үчүн Германияга кеткени кабарланган. Бул анын Президент Садыр Жапаровдун 2026-жылдын 10-февралындагы жарлыгы менен Министрлер кабинетинин төрагасынын орун басары жана УКМКнын төрагасы кызматтарынан бошотулушунун фонунда болгон. Учурда атайын кызматтын жетекчисинин милдетин Жумгалбек Шабданбеков аткарууда.