Көзкарандысыз Мамлекеттер Шериктештигинде (КМШ) Креативдүү индустриялар ассоциациясын түзүү боюнча иштер жүрүп жатат. Бул демилге чыгармачыл ишкердикти өнүктүрүүдө аймак өлкөлөрүнүн күч-аракетин бириктирүүгө багытталган.

Тармактык бирикмени түзүү идеясы Казакстандын президенти Касым-Жомарт Токаевге таандык. Бул демилгени ал өткөн жылдын октябрь айында Душанбеде өткөн мамлекет башчыларынын саммитинде көтөргөн. Казак тарап болочок уюмдун Уставынын долбоорун да даярдаган.

Документти эксперттик деңгээлде алгачкы кароо 30-мартта КМШнын штаб-квартирасында өттү. Талкууга төмөнкү өлкөлөрдүн өкүлдөрү катышты:

• Кыргызстан;
• Казакстан;
• Россия;
• Азербайжан;
• Беларусь;
• Тажикстан.

Диалогго ошондой эле Шериктештиктин Аткаруу комитетинин жана КМШ өлкөлөрүнүн Мамлекеттер аралык гуманитардык кызматташтык фондунун эксперттери кошулду.

Жолугушуунун жүрүшүндө катышуучулар мүчө-мамлекеттерден Уставдын долбооруна карата түшкөн сын-пикирлерди жана толуктоолорду деталдуу түрдө карап чыгышты. Эксперттер документти макулдашууну үстүбүздөгү жылдын май айынын экинчи жарымына пландаштырылган кезектеги жыйында улантууну макулдашты.