Бүгүн, 4-апрелде Бишкек шаарынын мэринин орун басары Азамат Кадыров Айтматов проспектисинин тургундары менен унаа жолун реконструкциялоого тийиштүү аймакты бошотуу маселеси боюнча жолугушуу өткөрдү. Бул тууралуу шаардын мэриясы билдирди.
Жолугушууда Кадыров эгерде бош жер участоктору болсо, Чыңгыз Айтматов проспектиси тарабынан объектти чегинтүү эсебинен Восточная көчөсүнөн жер участокторун бөлүп берүү маселеси карала турганын айткан. Ошондой эле жашоочулардын суранычы менен Восточная көчөсүнө тротуар курулуп, көчө оңдолорун билдирген. Ал эми компенсация маселеси ачык бойдон калууда.
Кадыровдун айтымында, бул маселе ар бир участок боюнча тургундар менен биргеликте жеке тартипте каралат. Долбоорду ишке ашыруу үчүн айрым чарба курулуштар жана тосмолор алынат, толугу менен «Рахат» кафеси кирет.
Мэрдин орун басары тургундардан долбоорду ишке ашырууда колдоо көрсөтүүнү өтүнгөн.
«Бардык тосмолор мамлекеттин эсебинен бир тилкеге орнотулуп, бирдиктүү дизайнда жасалат. Участоктору реконструкциялана турган тургундардын жана шаардык кызматтардын катышуусу менен маселелерди кароо максатында жумушчу топ түзүү чечими кабыл алынды. Ошондой эле юридикалык чектен чыккан участоктор да бар, жерди пайдаланууну контролдоо башкармалыгы тарабынан аларды демонтаждоо иштери жүргүзүлүүдө»- деп айтылат маалыматта
Эске салсак, Бишкектин Айтматов проспектисинин Масалиев көчөсүнөн Семетей көчөсүнө чейинки бөлүгү кеңейтилип, 6 тилкелүү болору айтылган. Учурда аталган проспекттин бул бөлүгү оңдоо иштерине жабылган. Жолдун кеңейтилишине байланыштуу кызыл сызыктан чыккан үйлөр 14 метрге артка жылуусу керек экендиги айтылган, бирок жашоочулар буга нааразычылыктарын билдирген. Учурда мэрия 5 метрге жылышы керек деген талап коюуда.
