Абдылас Малдыбаев атындагы Кыргыз улуттук академиялык опера жана балет театрынын балет труппаcы 8–23-декабрь күндөрү Испанияга гастролдук турга аттанат.

Маданият министрлигинин маалыматында, бул кыргыз балетинин Европадагы алгачкы гастролдору. Гастролдор Испаниянын Сарагоса, Кальпе, Риба-Роха-де-Эбро, Шатива, Аликанте, Ла-Нусия жана Гандия шаарларында болот.

Анда дүйнөлүк классиканын шедеврлери: «Ак куу көлү», «Щелкунчик» (П. Чайковский) «Дон Кихот» (Л. Минкус) чыгармалары коюлат.

“Гастролдорго балеттин 45 артисти, ошондой эле зарыл техникалык жана тейлөө кызматкерлери катышат. Делегацияны театрдын башкы директору Муратбек Бегалиев жана башкы балетмейстер Айзада Тумакова жетектейт. Испания аймагында ишке ашуучу бул долбоордун бардык чыгымдарын кабыл алуучу тарап — «GLOBAL SHOWTIME SERVICES S.R.L.» компаниясы көтөрөт”,- деп айтылат маалыматта.

Гастролдор «GLOBAL SHOWTIME SERVICES S.R.L.» тур компаниясы жана Улуттук балет театрынын ортосунда түзүлгөн кызматташтык меморандумунун алкагында ишке ашууда.

Министрлик кыргыз жана испан тараптары келечекте да театр искусствосу боюнча биргелешкен долбоорлорду түзүүнү пландаштырвп жатканын кошумчалады.