Кыргызстан Казакстан, Тажикстан жана Өзбекстан үчүн электр энергетика тармагындагы жогорку квалификациялуу адистерди даярдоочу аймактык борбор түзүүнү пландап жатат.

Тиешелүү макулдашууга Казань шаарында (Орусия) өткөн энергетикалык форумдун алкагында кол коюлду. Документ Борбор Азияда биринчи жолу чыңалуу астында иштөө технологиялары боюнча компетенция борборун түзүүнү карайт.

Бул долбоорду ишке ашыруу Кыргызстандын электр энергетика чөйрөсүндөгү билим берүү хабы катары ордун бекемдөөгө жана аймактагы адистердин даярдык деңгээлин жогорулатууга шарт түзөт деп күтүлүүдө.

Мындан тышкары, заманбап технологияларды киргизүү электр энергиясын өчүрүүлөрдүн санын жана узактыгын азайтууга, ошондой эле тармактардагы жоготууларды кыскартууга көмөктөшүүгө тийиш.