Борбор калаада КР Суу ресурстары, айыл чарба жана кайра иштетүү өнөр жайы министрлиги менен Кореянын айыл жамааттарын өнүктүрүү корпорациясынын (KRC) ортосунда Өз ара түшүнүшүү жөнүндө меморандумга кол коюунун расмий аземи болуп өттү. Документ агрардык секторду санариптик трансформациялоо жаатындагы стратегиялык өнөктөштүк боюнча макулдашууларды бекитет.

Кызматташтык түштүк кореялык алдыңкы технологияларды Кыргызстандын жер жана суу ресурстарын башкаруу системасына интеграциялоого багытталган. Өз ара аракеттенүү программасы көзөмөлдөөнүн автоматташтырылган системаларын колдонуу менен улуттук ирригациялык инфраструктураны терең модернизациялоону карайт.

Меморандумдун негизги пункттарынын бири болуп «акылдуу айылдар» (Smart Village) концепциясын ишке ашыруу саналат. Бул долбоор аймактардагы жашоо сапатын жана өндүрүштүн натыйжалуулугун жогорулатууга багытталган заманбап технологиялык инфраструктураны айыл жеринде түзүүнү болжолдойт. Кол коюлган документ республиканын айыл аймактарын туруктуу өнүктүрүү үчүн эки өлкөнүн ортосунда инвестиция тартууга жана эксперттик тажрыйба алмашууга укуктук негиз болуп берет.