«КЫЗМАТ» ММси жарандар үчүн административдик жол-жоболорду олуттуу түрдө жөнөкөйлөткөн Министрлер кабинетинин №856 токтому күчүнө киргенин маалымдайт. 2026-жылдын 23-январынан тартып Калкты тейлөө борборлорунун (КТБ) ишинде жана документтештирүү тутумдарында бир катар өзгөртүүлөр ишке ашырылды.

Негизги жаңылыктар:

• Балдар паспорттору: 16 жашка чейинки адамдар үчүн жалпы жарандык паспорт алууда жашаган жери боюнча катталгандыгы тууралуу маалымкат (прописка) талап кылынбайт.
• Санариптик нотариат: балага документ берүүгө карата келбей калган ата-энесинин макулдугу эми КТБ кызматкерлери тарабынан «Электрондук нотариат» тутуму аркылуу уникалдуу код боюнча электрондук форматта текшерилет.
• Аралыктан каттоодон чыгаруу: нотариалдык ишеним каттын негизинде жарандарды жашаган жери боюнча каттоодон чыгарууга уруксат берилди, буга чейин бул үчүн жарандын өзүнүн келиши талап кылынчу.
• Улутун өзгөртүү: ID-картаны алмаштырууда жаңы мыйзамдуу негиз — ата-энесинин биринин улутуна ылайык улуту тууралуу маалыматтарды оңдоо киргизилди.