2026-жылдын 1-январынан тарта Жамааттык коопсуздук жөнүндө келишим уюмунун (ЖККУ) баш катчылыгына казакстандык Имангали Тасмагамбетовдун ордуна кыргызстандык Таалатбек Масадыков келет. Бул тууралуу Орусиянын президентинин жардамчысы Юрий Ушаков билдиргенин орусиялык басылмалар жазууда.

64 жаштагы Таалатбек Масадыков – дипломат, эл аралык мамилелер боюнча эксперт. Ал өзгөчө жана толук ыйгарым укуктуу элчи дипломатиялык даражасына ээ.

Масадыков Москва мамлекеттик эл аралык мамилелер институтун, ошондой эле М.В. Ломоносов атындагы МГУнун Азия жана Африка өлкөлөрү институтун бүтүргөн. 2000–2002-жылдары Лондон экономика жана саясий илимдер мектебинин докторантурасында окуган.

1995–1996-жылдары Кыргыз Республикасынын Чет элдик инвестициялар жана экономикалык жардам боюнча мамлекеттик комитетинин башкы директорунун орун басары болгон. 1997–1998-жылдары Америкалык университеттин эл аралык мамилелер факультетинде декандын орун басары жана окутуучу болуп иштеген.

2002–2014-жылдары 12 жылдан ашык БУУ системасында иштеген. БУУнун Ооганстан боюнча атайын саясий миссиясынын саясий директору кызматын аркалаган.

2017-жылы Кыргызстандын президенти болууга талапкерлигин койгон.

2021-жылдын июль айында ЖККУнун төрага орун басары болуп дайындалган. 2022–2023-жылдары Кыргызстандын президентинин атайын тапшырмалар боюнча өкүлү болуп иштеген. 2024-жылдын январында ЖККУнун башкы катчысынын орун басары болуп дайындалган.