Кыргызстандан Кытайга алгачкы жолу жүгөрү экспорттолду. Экспорттун көлөмү 25 тоннаны түзүп, аны «Зиябидин Ата» дыйкан чарбасы жөнөттү. Бул тууралуу айыл чарба министрлиги билдирди.

Бул иш-чара 2022-жылдын 15-сентябрында эки өлкөнүн ортосунда кол коюлган жүгөрүгө карата фитосанитардык талаптар жөнүндө протоколго ылайык ишке ашырылган. Аталган документ айыл чарба продукцияларын экспорттоо үчүн укуктук негиз болуп саналат.

“Азыркы учурда Кыргызстандын эки ишканасы Кытайга жүгөрү экспорттоо укугуна ээ. Департамент өндүрүүчүлөргө колдоо көрсөтүү жана айыл чарба продукциясынын рыноктордогу үлүшүн кеңейтүү багытында ишин улантат”,- деп билдирди министрлик.