Мамлекеттик салык кызматы өлкө аймагынан тышкары ишмердүүлүк жүргүзгөн салык төлөөчүлөр үчүн салыктык жүктөмдүн олуттуу төмөндөтүлгөнүн маалымдайт. Салык кодексине киргизилген акыркы өзгөртүүлөргө ылайык, субъекттердин бул категориясы үчүн бирдиктүү салыктын чени 1%дан 0,1%га чейин азайтылды.

2026-жылдын 1-январынан тарта чет өлкөдө иштеген ишкерлер, анын ичинде мурда жалпы салык салуу системасын колдонгондор да аталган режимге милдеттүү тартипте өткөрүлөт. Жаңы ченге өтүү үчүн салык төлөөчүлөр катталган жери боюнча 2026-жылдын 1-февралына чейин арыз берүүгө милдеттүү. Мында 0,1% чени боюнча милдеттенмелерди эсептөө, белгиленген мөөнөттүн ичинде кайрылуу берилген иш жүзүндөгү датага карабастан, үстүбүздөгү жылдын башынан тартып жүргүзүлөт.

Бул өзгөртүүлөр 2025-жылдын 31-декабрындагы мыйзамга ылайык кабыл алынган. Реформа салыктык администрлөөнү жөнөкөйлөтүүгө, эл аралык бизнести жүргүзүү үчүн ачык-айкын шарттарды түзүүгө жана ата мекендик кызмат көрсөтүүлөрдүн экспортун стимулдаштырууга багытталган. Мекеме жеңилдетилген шарттарды белгилөө кыргызстандык компаниялардын чет элдик рыноктордогу атаандаштыкка жөндөмдүүлүгүн бекемдөөгө мүмкүндүк берерин белгилейт.