Маданият, маалымат жана туризм министрлиги Намыс кодексинин долбоорун иштеп чыгып, коомдук талкууга койду.

Маалыматка ылайык, аталган кодекстин долбоору жарандарга, жаштарга, коомдук ишмерлерге жана жалпы калкка этикалык жана адамгерчиликтүү жүрүм-турумдун үлгүсүн көрсөтүүчү, бирдиктүү моралдык стандарттардын жыйындысы катары иштелип чыккан.

“Кыргыз Республикасынын коомунда акыркы жылдары социалдык жоопкерчилик, өз ара сый-урмат, коомдук адеп-ахлак жана мекенге берилгендик темалары актуалдуу болуп келүүдө. Өнүгүп жаткан демократиялык жана көп улуттуу мамлекет катары Кыргыз Республикасы коомдук жүрүм-турумда мыйзамга ылайык эле эмес, моралдык жана маданияттык ченемдерди да бекемдөөгө муктаж”,- деп айтылат долбоордун негиздеме-маалым катында.

Кодекс кыргыз коомунда төмөнкүдөй маанилүү түшүнүктөрдү жайылтуу жана бекемдөө максатында иштелип чыккан:

• ар-намысты жана кадыр-баркты сактоо;
• мамлекеттик символдорго жана тарыхка урмат;
• улууларга сый-урмат, кичүүлөргө камкордук;
• жек көрүү, агрессия жана кастыкка каршы сабырдуулук;
• адептүүлүк, чынчылдык жана калыстык;
• коомдук ынтымак жана мекенге берилгендик.

Намыс кодексин төмөнкү багыттарда колдонуу сунушталат:

• билим берүү мекемелеринде тарбиялык иштерде;
• мамлекеттик жана муниципалдык кызматкерлердин адептик жүрүм-турумунда;
• жаштар саясаты, аскердик-патриоттук тарбия, массалык маалымат каражаттарында;
• маданий иш-чаралардын идеологиялык базасы катары;
• жалпы жарандык активдүүлүктү жана жарандык жоопкерчиликти өнүктүрүүдө.