Өкмөт башчы Адылбек Касымалиев Кыргызстанда 2025–2030-жылдарга карата электр энергиясына орто мөөнөттүү тарифтик саясатын бекитүү жөнүндө токтомго кол койду. Токтом бүгүн, 1-майдан тарта күчүнө кирди.
Ага ылайык, өлкөдө электр энергиясынын баасы 26 тыйынга кымбаттап, 1 кВт саат электр энергиясынын наркы 1 сом 37 тыйынга чыкты. Ал эми 700 кВт сааттан ашкандан кийин 2,60 сомдон эсептелине баштайт.
Ал эми электр энергиясын өнөр жай үчүн колдонгондор бүгүндөн баштап 3 сом 49 тыйын төлөшөт.
Өкмөт бул токтом тартыштык шарттарында электр энергиясын керектөөчүлөрдү электр менен үзгүлтүксүз жабдуу, ошондой эле электр менен жабдуучу уюмдардын чыгымдарынын ордун толтурууну камсыз кылуу максатында кабыл алынганын билдирди.
