Премьер-министр Улукбек Марипов коронавируска каршы эмдөөдөн азырынча өтпөйт. Бул тууралуу Министрлер кабинетинин басма сөз кызматынын башчысы Толкун Камчыбекова кабарлады.
Улукбек Мариповдун пикиринде эмдөөнү алгач коркунуч зонасындагылар – медицина кызматкерлери, аскер кызматкерлери, мугалимдер алышы керектиги айтылат.
Ал эми премьер-министр өлкөнүн башка жарандары сыяктуу эле вакцинага мүмкүнчүлүк алуу маанилүү деп эсептейт, ошондуктан ал вакцинаны Саламаттык сактоо министрлиги тарабынан аныкталган артыкчылыктуу тартипте алат.
Билдирүүгө таянсак, премьер-министр буга чейин коронавирус илдети менен ооруган, буга байланыштуу дарыгерлер анын иммунитети азыркы учурда өлкөнүн бардык жарандары үчүн вакцинанын көбүрөөк жеткиликтүүлүгүн күтүүгө мүмкүнчүлүк берерин белгилеген.
