Кыргызстанда 11-февралда президенттин жарлыгы менен Архитектура, курулуш жана турак жай-коммуналдык чарба агенттиги министрлик болуп түзүлдү.
Курулуш министрлиги өлкөдөгү он жетинчи министрлик болуп калды. Буга чейин өлкөдө Тышкы иштер министрлиги (1), Ички иштер министрлиги (2), Юстиция министрлиги (3), Коргоо министрлиги (4), Каржы министрлиги (5), Суу ресурстары, айыл чарба жана кайра иштетүү өнөр жайы министрлиги (6), Транспорт жана коммуникациялар министрлиги (7), Экономика жана коммерция министрлиги (8), Өзгөчө кырдаалдар министрлиги (9), Билим берүү жана илим министрлиги (10), Санариптик өнүктүрүү министрлиги (11), Эмгек, социалдык камсыздоо жана миграция министрлиги (12), Саламаттык сактоо министрлиги (13), Энергетика министрлиги (14), Маданият, маалымат, спорт жана жаштар саясаты министрлиги (15), Жаратылыш ресурстары, экология жана техникалык көзөмөл министрлиги (16) болгон.
Жаңы түптөлгөн министрликти ал агенттик болуп турганда жетектеп келген Нурдан Орунтаев башкармай болууда. Азырынча, ал — министрдин милдетин аткаруучу.
Бүгүн, 12-февралда Жогорку Кеңештин Транспорт, коммуникациялар, архитектура жана курулуш боюнча комитети Орунтаевдин талапкерлигин карап, аны министр кылып дайындоого макулдук берди. Эми анын талапкерлиги Жогорку Кеңештин 13-февралдагы жалпы жыйынында каралышы керек.
Өмүр баяны
Нурдан Орунтаев 1988-жылы 9-сентябрда Нарындын Кочкор районунун Туз айылында туулган.
2011-жылы Россиянын ИИМинин Волгоград академиясын «юриспруденция», «соттук криминалистика» адистиги боюнча аяктаган. Эмгек жолун Бишкектин Свердлов райондук милициясында тергөөчү болуп баштаган.
Эмгек жолу:
- 2011-2012-жыл — Бишкектин Биринчи май райондук ички иштер бөлүмүнүн тергөөчүсү;
- 2012-2014-жыл — ИИМ Академиясынын окутуучусу;
- 2015-2016-жыл — Октябрь райондук ИИБинин тергөө бөлүмүнүн башчысы;
- 2016-2018-жыл — Октябрь райондук ИИБдин улук тергөөчүсү;
- 2018-2019-жыл — Свердлов райондук ИИБинин тергөө кызматынын башчысынын орун басары;
- 2019-жыл — Чүйдүн Москва райондук ИИБинин тергөө кызматынын башчысы;
- 2019-2020-жыл — Чүйдүн Сокулук райондук ИИБинин тергөө кызматынын башчысы;
- 2020-2021-жыл — ИИМдин тергөө кызматынын тергөөчүсү;
- 2021-жылы — ИИМдин тергөө кызматынын башкармалыгынын башчысынын орун басары;
- 2022-жылы — Бишкек мэриясынын муниципалдык мүлктү башкаруу департаментинин директору;
- 2022-2023-жыл — Бишкек шаарынын вице-мэри;
- 2023-2025-жыл — Архитектура, курулуш жана турак жай-коммуналдык чарба мамлекеттик агенттигинин директору;
- 2025-жыл, февраль — Курулуш, архитектура жана турак жай-коммуналдык чарба министринин милдетин аткаруучу.
