Министрлер кабинетинин жетекчиси Адылбек Касымалиев бүгүн, 25-ноябрда, болуп өткөн аппараттык жыйында мамлекеттик органдардын жетекчилерине Жогорку Кеңеш депутаттарын шайлоо алдындагы үгүт иштерине кийлигишпөөнү бир жолу эскертти. Бул тууралуу ал Фейсбуктагы баракчасында билдирди.

Анын айтымында, шайлоо алдындагы үгүт иштери аяктап баратат, бирок айрым аймактарда эскертүүлөргө карабастан үгүт иштерине кийлигишүүгө аракет кылган кызматкерлерди иштен алуу учурлары катталды.

Касымалиев ар бир жаран басымсыз, кийлигишүүсүз жана сатып алуу аракеттерисиз татыктуу талапкерди эркин тандоо мүмкүнчүлүгүнө ээ болушу керектигин баса белгиледи. Ал бийлик эч бир талапкерди колдобой тургандыгын жана эл кимди тандаса, ошол депутат менен иштешерин айтты.

Минкаб жетекчиси жарандарга кайрылып, алдыдагы шайлоого активдүү катышууга, тандоого жоопкерчиликтүү жана аң-сезимдүү мамиле кылууга чакырды.