Улуттук инвестициялар агенттиги жана эл аралык инвестициялык консорциумдун өкүлдөрү Ош облусунун Кара-Суу районунда ири долбоорду ишке ашыруу маселесин талкуулашты. Жолугушуу 24-ноябрда Агенттиктин директору Равшанбек Сабиров жана консорциумдун уюштуруучусу «Вэньц Компани» компаниясынын катышуусу менен өттү.

Консорциумдун курамына Qiyan Holdings Limited, «Ухай» компаниясы жана Bitmain Technology Ltd кирет. Бул компаниялар көмүр казып алуу, энергетика жана интеллектуалдык эсептөөлөр тармагында чоң тажрыйбага ээ.

Долбоор чоң көмүр шахтасын курууну, бир катар жылуулук электр станцияларын салууну, интеллектуалдык эсептөөлөр борборун түзүүнү жана жогорку өндүрүмдүүлүктөгү эсептөө жабдууларын орнотууну камтыйт.

Тараптар долбоорду ишке ашыруунун негизги параметрлерин, мамлекеттик-жеке өнөктөштүк механизмдерин жана мамлекет тарабынан көрсөтүлүүчү колдоо чараларын талкуулашты. Сабиров белгилегендей, Кыргызстан ири инвестицияларды тартуу, өнөр жайды, энергетиканы жана санариптик экономиканы өнүктүрүү үчүн укуктук базаны чыңдап, колдоого ылайыктуу шарттарды түзүп келет.

Айрыкча долбоордун социалдык-экономикалык таасирине көңүл бурулду: жаңы жумуш орундарын түзүү, өнөр жай жана энергетикалык инфраструктураны өнүктүрүү, региондун инвестициялык жагымдуулугун жогорулатуу жана Борбор Азияда жаңы технологикалык кластерди түзүү.

Жолугушуунун жыйынтыгында тараптар кызматташууну улантуу жана долбоордун кийинки этаптарын даярдоого киришүү боюнча макулдашты.