Жогорку Кеңештин Агрардык саясат, суу ресурстары, экология жана регионалдык өнүктүрүү боюнча комитетинин жыйынында төмөнкү агымдагы мамлекеттер тарабынан стратегиялык гидротехникалык объекттерди күтүүгө кеткен чыгымдарды компенсациялоо зарылдыгы тууралуу маселе көтөрүлдү.

Депутат Умбеталы Кыдыралиев Токтогул ГЭСинин иштешинде каржылык жүктөмдүн адилетсиз бөлүштүрүлүп жатканына токтолду. Анын айтымында, бул түйүндү заманбапташтырууга багытталган 500 миллион доллардан ашык насыяны Кыргызстан төлөп жатат, ал эми суунун 80 пайызы Казакстан менен Өзбекстанга кетет. Парламентарий республика коңшулардын муктаждыгы үчүн суу ресурстарын топтоодон түз экономикалык пайда көрбөй жатканын баса белгилеп, сууну пайдалануу үчүн акы төлөө боюнча эл аралык тажрыйбаны киргизүүгө чакырды.

Министрлер Кабинетинин Төрагасынын орун басары Бакыт Төрөбаев айрым объекттер боюнча биргелешип каржылоо механизмдери буга чейин эле иштеп жатканын маалымдады. Алсак, Өзбекстан Ала-Бука районундагы суу сактагычтарды күтүүгө кеткен чыгымдарды толук жаап, оңдоо иштерин жүргүзүү боюнча милдеттемелерин аткарууда. Ал эми Токтогул ГЭСи боюнча Дүйнөлүк банктын карыздык каражаттары жабдуулардын ишин оптималдаштырууга жана станциянын кубаттуулугун 1200дөн 1440 мегаваттка чейин жогорулатууга мүмкүндүк бергени белгиленди.

Министрлер Кабинети ошондой эле Кыргызстандын Президентинин позициясына шилтеме берди. Ага ылайык, республика коопсуздукту камсыз кылуу максатында суу сактагычтарды өз күчү менен оңдоону көздөп жатат. Ошол эле учурда бийлик инфратүзүмдү калыбына келтирүүгө коңшу мамлекеттердин ыктыярдуу түрдө катышуу мүмкүнчүлүгүн четке какпайт. Суу тармагындагы өз ара эсептешүүлөр боюнча толук маалымат депутаттар үчүн жабык форматта (чектелген жеткиликтүүлүк режиминде) бериле турган болду.