Президент Садыр Жапаров Тажикстанга болгон иш сапарынын алкагында Душанбе шаарында өткөн Көз карандысыз Мамлекеттер Шериктештигинин (КМШ) Мамлекет башчыларынын кеңешинин жыйынына катышып, сөз сүйлөдү.

Мамлекет башчысы өз кайрылуусунда Шериктештик өлкөлөрүндө социалдык-экономикалык өнүгүүнүн туруктуу тенденциялары байкалып жатканын белгилеп, бул интеграциялык механизмдердин натыйжалуулугун жана сооданы жөнөкөйлөтүү аракеттеринин жемишин көрсөтөрүн айтты.

«Бул жыйынтыктар жалпы экономикалык мейкиндикти түзүү багытында ырааттуу жылыштар бар экенин тастыктайт», — деди Жапаров.

Президент ошондой эле Түркмөнстанды 2026-жылы КМШга төрагалыкты өткөрүп алышы менен куттуктап, Кыргызстан Шериктештик алкагындагы бардык интеграциялык демилгелерге активдүү катышарын ырастады.

Жыйын соңунда КМШ өлкөлөрүнүн лидерлери коопсуздук, экономика, транспорт, энергетика жана гуманитардык кызматташтык тармактарындагы өз ара координацияны күчөтүүгө багытталган бир катар документтерге кол коюшту.