Өлкө калкынын болжол менен 11%ы терс маанайдагы маалыматтын көбөйүшүнөн улам психикалык көйгөйлөргө дуушар болууда. Бул тууралуу саламаттык сактоо министри Эркин Чечейбаев «Кабар» агенттигине берген маегинде айтты.

Анын айтымында, мындай көрсөткүч республикалык психикалык борборлорго кайрылгандардын расмий статистикасына негизделет. Министр жардам сурап кайрылбагандар көп болгондуктан, мындай көйгөйү бар адамдардын чыныгы саны мындан кыйла жогору экенин белгиледи.

Чечейбаевдин сөзүндө, мындай бейтаптардын басымдуу бөлүгү психикалык оорулар менен жабыркагандар эмес, алардын арасында депрессия, тынчсыздануу, нерв системасынын ар кандай бузулуулары менен күрөшкөндөр көп.

Министр мындай тенденция көп өлкөлөргө мүнөздүү экенин, ал маалыматтык мейкиндиктеги негативдүү контенттин өсүшү менен байланыштуу экенин белгиледи. Анын айтымында, аудитория көбүнчө терс маанайдагы жаңылыктарды тандап калгандыктан, блогерлер жана журналисттер көрүүлөрдү көбөйтүү үчүн дал ушундай материалдарды таратууга умтулушат.

Мындан тышкары, Чечейбаев бүгүнкү күндө адамдардын жашоо жүгү өтө жогору экенине токтолду: Саламаттык сактоо министрлигинин баалоосу боюнча, азыр орто эсеп менен адам күнүнө 600гө жакын чечим кабыл алат, мурда болсо болгону бир нече гана чечим кабыл алынчу. Мындай көлөм мээнин чарчашына жана психикалык чыңалуусуна алып келип, жалпы психологиялык абалды начарлатат.