Мамлекеттик салык кызматынын төрагасы Алмамбет Шыкмаматов ведомствонун аппараттык кеңешмесинде 2025-жылдагы ишмердүүлүктүн жыйынтыгы боюнча отчет берди.

Жылдын жыйынтыгы боюнча салыктар жана камсыздандыруу төгүмдөрүнүн иш жүзүндөгү түшүүсү 389 млрд сомго жетти, ал эми бекитилген план 343 млрд сом болчу. Аткаруу 113,6%ды түзүп, бюджетке кошумча 46,5 млрд сом түшүүсүн камсыздады. 2024-жылга салыштырмалуу жыйымдардын көлөмү 87,5 млрд сомго көбөйүп, өсүү темпи 28,9%ды көрсөттү.

Салык төлөмдөрү бөлүгүндө декабрдын аягына карата аткаруу божомолу 268 млрд сомдук планда 307–308 млрд сомду түзүүдө. Бул багыт боюнча өсүү өткөн жылга салыштырмалуу болжол менен 79 млрд сомду түздү. Жетишилген көрсөткүчтөр ведомство үчүн тарыхый максимум деп таанылды.

2026-жылга артыкчылыктар

Келерки жылы МСКнын ишмердүүлүгү чакан жана орто бизнес үчүн салык жүгүн либералдаштыруу боюнча стратегиялык милдеттерди ишке ашырууга багытталат. Стартаптарды колдоого, салык базасын кеңейтүүгө жана инвестиция тартууга багытталган мыйзамдарга өзгөртүүлөрдү киргизүү жана Президенттин жарлыктарын чыгаруу пландаштырылды.

Иштин негизги багыттары катары төмөнкүлөр аныкталды:

• көмүскө экономика менен күрөштү күчөтүү;
• салык карызын системалуу түрдө азайтуу;
• көзөмөлдөөнүн заманбап аналитикалык ыкмаларын киргизүү.

Санариптештирүү жана «Kezet» системасы

2026-жылдын январында ведомство «Kezet» жаңы электрондук эсепке алуу системасын тааныштырууну пландап жатат. Санариптик платформа камералдык текшерүүлөрдү байланышсыз (дистанттык) форматка өткөрүүгө мүмкүндүк берет жана бардык текшерүү иш-чараларына борбордук аппараттан онлайн-мониторинг жүргүзүүнү камсыздайт. Негизги аналитикалык модулдарды бирдиктүү системага интеграциялоо салык кызматынын кызматкерлеринин салык төлөөчүлөр менен өз ара аракеттенүүсүнүн ачык-айкындуулугун жогорулатууга багытталган.

Кеңешменин аягында Алмамбет Шыкмаматов кызматкерлердин дарамети жана тажрыйбасы жаңы санариптик инструменттер менен айкалышта келерки жылы белгиленген максаттуу көрсөткүчтөргө жетүүгө мүмкүндүк берерин белгиледи.