13-декабрдан 15-декабрга чейин күтүлүп жаткан жаан-чачынга байланыштуу Бишкек-Ош унаа жолунун Төө-Ашуу, Ала-Бел ашуусу жана Чычкан капчыгайында кар көчкү түшүүсү күтүлөт. Бул тууралуу ӨКМ билдирди.

Ошондой эле төмөнкү аймактарда кар көчкү түшүп, кар күрткүсү пайда болуусу күтүлүүдө:

• Ала-Бука-Каныш-Кыя унаа жолунун Чапчыма ашуусунда,
• Красная Горка-Ак-Таш унаа жолунун 0-3 чакырымдарында,
• Мырзаке-Кара-Кулжа-Алайкуу унаа жолунун 40-90 чакырымдарында,
• Каракол-Эңилчек унаа жолунун Чоң-Ашуу ашуусунда,
• Балыкчы-Казарман-Жалал-Абад унаа жолунун Көк-Арт ашуусунда.

Мындан улам жолдор тайгак болуп, муз тоңот.

Өзгөчө кырдаалдар министрлиги унаалардын ортосундагы 500 метр аралык кыймыл чектелиши зарылдыгын эскертти.