Саламаттыкты сактоо жана социалдык өнүктүрүү министринин биринчи орун басары Ализа Солтонбекова Калыс-Ордо жаңы конушундагы №13 үй-бүлөлүк медициналык борборго барды. Бул туурал аталган министрликтен билдиришти.
Учурда өлкө боюнча жыл сайын өтө турган Европалык эмдөө жумалыгы башталды.
«Эмденүү менен биз өзүбүздү жана үй-бүлөбүздү гана коргобостон, коопсуз коомго жана баардыгыбыздын ден-соолугубуздун чың болушуна салым кошобуз», — деген Солтонбекова.
Анын айтымында, өлкөдө оорулардын алдын алуу жана беш жашка чейинки балдарды коргоо үчүн эмдөөлөр жүргүзүлүүдө, жана «пандемияны жоюуга» жардам берүүчү куралы катары COVID-19га каршы эмдөөгө өзгөчө көңүл бурулууда.
«COVID-19 пандемиясы эмдөөнүн маанилүүлүгүн көрсөттү жана биз колубуздагы вакциналардын потенциалын толук колдонушубуз керек”, — деп кошумчалаган Солтонбекова.
Мындан тышкары, ал балдарды эмдөө улуттук эмдөө графигине ылайык жүргүзүлүп жаткандыгын белгилеген. Анын негизинде ар бир ата-эне баласын эң коркунучтуу жугуштуу оорулардан коргой аларын кошумчалаган.
