Президент Садыр Жапаров транспорт каражаттарын каттоо системасын реформалоого багытталган жарлыкка кол койду. Документке ылайык, автотранспорт тармагындагы айрым мамлекеттик кызматтардан түшкөн кирешелер убактылуу республикалык бюджетке которулбайт.

Жарлыкка ылайык, 2026-жыл толугу менен (1-январдан 31-декабрга чейин) Транспорт каражаттарын каттоо боюнча мамлекеттик борбор (Президенттин Иш башкармалыгынын карамагында) төмөнкү булактардан түшкөн каражаттын 100%ын өзүндө калтырат:

• сандардын/тамгалардын өзгөчө айкалышы бар мамлекеттик номерлерди сатуудан;
• аты жазылган (именной) мамлекеттик номерлерди сатуудан;
• алдыңкы каптал терезелерди караңгылатууга (тонировка) уруксат берүүдөн;
• эски/эсептен чыгарылган мамлекеттик номерлерди металлоломго өткөрүүдөн.

Акча кайда жумшалат?

Чогулган бардык каражат мекеменин атайын эсебине түшөт. Максат – аталган мамлекеттик борбордун материалдык-техникалык базасын чыңдоо, инфраструктурасын модернизациялоо жана жакшыртуу.

Министрлер кабинетине жарлыкты ишке ашыруу, ал эми Президенттин иш башкармалыгына акчанын натыйжалуу жана максаттуу жумшалышын катуу көзөмөлдөө тапшырылды.