Бүгүн, 28-ноябрда Кыргызстандын тышкы иштер министри Жээнбек Кулубаев Экономикалык кызматташтык уюмунун (ЭКУ) Тышкы иштер министрлер кеңешинин 29-жыйынына онлайн-режимде катышты. Бул тууралуу ТИМ билдирди.

Жыйында министрлер аймактагы соода-экономикалык, транспорттук-логистикалык, энергетикалык жана гуманитардык кызматташтыктын актуалдуу маселелерин талкуулашкан.

Жээнбек Кулубаев сөз сүйлөп, Экономикалык кызматташтык уюмунун потенциалын натыйжалуу пайдалануунун маанилүүлү экенин белгилеген. Ошондой эле ал CASA-1000 долбоорунун негизинде уюмдун бирдиктүү энергетикалык тутумун түзүү боюнча ишти баштоону сунуштаган.

Мындан тышкары уюмдун “Таза энергия борбору” уставынын күчүнө киришин куттуктап, күн жана гидроэнергияны интеграциялоо, ошондой эле тоолуу аймактарда энергия үнөмдөөчү технологияларды киргизүү боюнча программаларды иштеп чыгуунун маанисин баса белгилеген.

Кулубаев ошондой эле IT-парктардын жалпы платформаларын, жасалма интеллект, электрондук коммерция жана киберкоопсуздук боюнча биргелешкен программаларды өнүктүрүү сунуштаган.

Жыйындын жыйынтыгында делегациялар бир катар уюштуруучулук чечимдерди кабыл алышкан. Тышкы иштер министрлер кеңешинин кезектеги жыйыны 2026-жылы Пакистанда өтөрү айтылды.