Бир күндө Нарын шаарында жана Аксы районунда эки жаш бала Нарын дарыясына түшүп кетип, дайынсыз болууда. Бул тууралуу Өзгөчө кырдаалдар министрлиги билдирди.

ӨКМнын маалыматында, 5-апрелде Нарын шаарынын Ленин жана Раззаков көчөлөрүнүн кесилишинде 5 жаштагы О.А.О. аттуу бала дарыяга түшүп кеткен. Бүгүн, 6-апрелде, издөө иштери уланып, ага куткаруучулар, милиция кызматкерлери жана жергиликтүү тургундардан турган жалпы 96 адам, 1 кайык жана 1 дрон тартылган.

Ошол эле күнү Аксы районунун Кум айылында да 8 жашар К.И. аттуу бала дарыяга түшүп кеткен. Издөө иштерине 86 адам, ошондой эле 1 дрон жана 3 кайык тартылган.

Аксыда издөө иштерин жеңилдетүү максатында “Үч-Коргон ГЭСи” менен Нарын дарыясындагы суунун көлөмүн азайтуу боюнча макулдашуу түзүлгөн. Ага ылайык, 6-апрелде саат 08:00дөн баштап суу азайтыла баштаган.

Учурда эки аймакта тең издөө-куткаруу иштери уланууда. Кошумча маалымат берилет.