Токмок шаарындагы №12 орто мектепте окуучулардын мушташы боюнча Чүй облусунун милиция кызматкерлери тарабынан тергөөгө чейинки текшерүү иштери жүргүзүлүүдө.
Чүй облустук милициясынын маалыматына караганда, 3-апрелде Токмок ШИИБге 1975-жылы туулган И.Р. аттуу жаран арыз менен кайрылган. Ал ошол эле күнү саат 11:00 чамасында 2008-жылы туулган уулу И.А.нын денесине залал келтирген башка мектептин 10-11-класстарынын окуучуларына чара көрүүнү суранган. Бул факт каттоого алынып, боюнча текшерүү иштери башталган.
Маалым болгондой, 3-апрелде саат 11:30дар чамасында Токмок шаарындагы №1 гимназия-мектебинин 10-классынын окуучулары 2008-жылы туулган И.А., К.Р., А.А. жана Ю.М. Токмок шаарындагы №12 орто мектепке жаш жол кыймылынын инспекторунун сынагына барышкан.
Ал жактан окуучу К.Р. аталган мектептин окуучусу «Э» менен кайым айтыша кетип, №1 жана №12 мектептердин окуучулары ортосунда мушташ чыккан. Жыйынтыгында жашы жете элек И.А. шаардык ооруканага жаткырылган.
Учурда Токмок шаарындагы №12 орто мектептин мушташка катышкан окуучуларынын өздүгү жана жашаган жери такталууда.
Бул факты боюнча соттук-укуктук экспертизалар дайындалып, материалды кароо улантылууда, анын жыйынтыгы боюнча Жазык-процесстик кодексинин талаптарына ылайык процессуалдык чечим чыгарылат.
Биздин Телеграм каналга катталыңыз
