Бүгүн, 24-июлда саат 12:30 чамасында Балыкчы−Казарман–Жалал-Абад альтернативдик унаа жолунун 283-чакырымына (Капчыгай тилкеси) кум-шагыл аралаш таштар түшүп, жол жабылды. Бул тууралуу ӨКМ билдирди.

Маалыматка ылайык, түшкөн кум-шагылдын көлөмү болжол менен 37 миң 500 метр кубду түзөт. Учурда жеринде тактоо, ошондой эле жол тазалоо иштери жүргүзүлүүдө.

ИИМдин Жол кыймылынын коопсуздугун камсыздоо башкы башкармалыгы айдоочуларга жогорудагы чектөөнү эске алып, зарылчылык болбосо жолго чыкпай турууну эскертти.