Ысык-Көлдүн Каракол шаарында баасы дээрлик 1 млн долларга бааланган жер тилкеси жана ун комбинаты мамлекетке кайтарылды. Бул тууралуу УКМКдан билдиришти.
Атайын кызматтын маалыматы боюнча, Караколдун мэриясында мурда иштеген О.И. аттуу чиновник башка түзүмдүк бөлүмдөр менен сүйлөшүп алып, 2012-2013-жылдары коммерциялык максаттагы жерди арзан баага жеке менчикке берип жиберген. Ошондой эле шаардын башкы планына каршы келерине карабай 10 гектардан ашык жерди бөлүп берүү тууралуу токтом чыгарган.
УКМК бул ишти иликтөөгө алып, натыйжада мурдагы чиновник келтирилген зыяндын ордун толтуруу үчүн 1,37 гектар жерди жана Каракол шаарындагы ун комбинатын 0,5 гектар жери менен мамлекетке кайтарып берген. Бул эки объекттин баасы 1 млн долларды түзөт.
