Улуттук коопсуздук мамлекеттик комитети (УКМК) Коргоо министрлигиндеги системалуу коррупция фактыларын аныктады. Мыйзамсыз аракеттер өлкөнүн коргоо мекемесинин муктаждыктары үчүн курал-жарак жеткирүү боюнча милдеттемелерди аткарбоого байланыштуу болгон.

Ыкчам иш-чаралардын жана КР Каржы министрлигинин аудитинин жүрүшүндө жеткирүүчү компаниялардын бири тарабынан келишимдин шарттарын бузуу фактысы аныкталган. Коррупциялык схеманын иштешинин натыйжасында мамлекетке келтирилген зыян 244 млн 587 миң 870 сомду (2,7 млн еврого барабар) түздү.

Козголгон кылмыш ишинин алкагында жеткирүүчү фирма аталган сумманы республикалык бюджетке толугу менен төлөп берди. Учурда УКМК бул схеманы уюштурууга катыштыгы бар Коргоо министрлигинин кызмат адамдарын аныктоого жана жоопкерчиликке тартууга багытталган тергөө иштерин улантууда. Атайын кызматтын өкүлдөрү көп миллиондогон зыянга жол берүүдө мекеменин ар бир жооптуу кызматкеринин ролун тыкыр иликтөөнү көздөөдө.