Бүгүн Кыргызстандын президенти Садыр Жапаров менен Монголиянын президенти Ухнаагийн Хурэлсух расмий жолугушуу өткөрдү. Жолугушуу мамлекет башчысынын расмий сапарынын алкагында өттү.

Тараптар саясат, соода-экономика, транспорт жана айыл чарба тармактарында эки тараптуу кызматташуунун негизги багыттарын талкуулашты. Мындан сырткары, санариптештирүү, маданий-гуманитардык байланыштар жана туризм маселелерине өзгөчө көңүл бурулду.

Садыр Жапаров Кыргызстан менен Монголияны илгерки доорлордон бери достук байланыштар бириктирерин белгилеп, “Бизди көчмөн салттар, руханий баалуулуктар жана жаратылышка болгон аяр мамиле бириктирет” — деп белгиледи.

Мамлекет башчысы маданий жакындыктын натыйжасында эки өлкө ортосундагы өз ара ишеним артып жатканын кошумчалады. Кыргызстан үчүн Монголия менен кызматташтык тышкы саясаттын артыкчылыктуу багыттарынын бири экени белгиленди.

Ухнаагийн Хурэлсух кыргыз элине жылуу кабыл алуу үчүн ыраазычылык билдирип, бул сапар эки өлкө ортосундагы 30 жылдык алаканы баалоо жана келечектеги кызматташтыктын багыттарын аныктоо үчүн чоң мүмкүнчүлүк экенин айтты.

Ал ошондой эле акыркы жылдары саясий диалог жанданып, экономикалык байланыштар да динамикалуу өнүгүп жатканын белгиледи. Сапардын жыйынтыгында бир катар жаңы документтерге кол коюлушу күтүлүүдө.

Бизди көчмөн салттар, руханий баалуулуктар жана жаратылышка болгон аяр мамиле бириктирет

Садыр Жапаров

Президент Кыргызской Республики