Орусия президенти Владимир Путиндин Кыргызстанга болгон мамлекеттик сапарынын алкагында бүгүн, 26-ноябрда, кыргыз-орус кызматташтыгы боюнча жети эки тараптуу документке кол коюлду. Бул тууралуу президенттин басма сөз кызматы билдирди.

«Ынтымак-Ордодогу» жолугушууда Садыр Жапаров жана Владимир Путин мамилелерди жана стратегиялык өнөктөштүктү тереңдетүү жөнүндө биргелешкен билдирүүгө кол коюшту.

Ошондой эле билим берүү, саламаттыкты сактоо, миграция, коопсуздук, экономикалык жана аскердик-техникалык кызматташуу жаатында өз ара аракеттенүүнү арттырууга багытталган эки тараптуу документтерге кол коюлду:

1. Кыргызстандын Экономика жана коммерция министрлиги менен Орусиянын Экономикалык өнүгүү министрлигинин ортосундагы стратегиялык пландоо жаатында кызматташуу жөнүндө меморандум;
2. Кыргызстан менен Орусиянын өкмөттөрүнүн ортосундагы эки өлкөнүн ички иштер жана миграция маселелери боюнча компетенттүү органдардын өкүлчүлүктөрүнүн укуктук статусу жөнүндө макулдашуу;
3. Кыргызстан менен Орусиянын өкмөттөрүнүн ортосундагы Б.Н. Ельцин атындагы Кыргыз-орус Славян университетинин кампусун куруу шарттары жөнүндө макулдашуу;
4. Кыргызстан менен Орусиянын өкмөттөрүнүн ортосундагы калктын санитардык-эпидемиологиялык бейпилдигин камсыз кылуу жаатында кызматташтык жөнүндө макулдашуу;
5. Кыргызстан менен Орусиянын Саламаттык сактоо министрликтеринин ортосундагы кардиология жаатында өз ара түшүнүшүү жөнүндө меморандум;
6. Кыргызстан менен Орусиянын ортосундагы 2017-жылдын 20-июнундагы Аскердик-техникалык кызматташтыкты өнүктүрүү жөнүндө келишимге өзгөртүүлөрдү киргизүү тууралуу протокол;
7. “Кыргыз почтасы” ачык акционердик коому менен “Россия почтасы” акционердик коомунун ортосундагы ниеттер жөнүндө макулдашуу.