Жапон өкмөтү Ысык-Көл жана Ош облустарындагы ооруканаларга жалпы 105 миң 200 долларга медициналык жабдыктарды берди. Бул тууралуу Саламаттык сактоо министрлиги билдирди.

Маалыматка ылайык, Жапониянын Кыргызстандагы элчилигинде Кыргызстандын саламаттык сактоо тутумун чыңдоого багытталган гранттык келишимдерге кол коюу аземи болуп өткөн. Бул колдоо жапон өкмөтүнүн Кыргызстандагы «Өсүмдүктүн тамырлары жана адамдын коопсуздугу» программасынын алкагында ишке ашырылууда.

Кол коюу аземине саламаттык сактоо министри Эркин Чечейбаев, Жапониянын Кыргызстандагы элчиси Хидэки Года жана грант алуучу саламаттык сактоо мекемелеринин өкүлдөрү катышкан.

Келишимге ылайык, Ысык-Көл облусунун Тоң районунун Жалпы дарыгерлик практика борборуна видеокольпоскоп, электрокардиограф, ЛОР-комбайн, стерилизациялык жана диагностикалык жабдуулар тапшырылат. Жалпы гранттын суммасы 44 миң 400 долларды түзөт.

Ал эми Ош облусунун Алай районунун жалпы дарыгерлик практика борбору 64 миң 800 долларды түзгөн заманбап жабдуулар менен камсыздалат. Бериле турган техниканын тизмесине наркоз аппараты, операциялык лампалар жана электрокоагулятор кирет.

Министрлик бул жабдуулар аталган аймактардагы тургундар үчүн медициналык жардамдын жеткиликтүүлүгүн жана сапатын жогорулатууга өбөлгө болорун кошумчалады.