КР ИИМдин Жол кыймылынын коопсуздугун камсыздоо башкы башкармалыгынын (ЖКККББ) башчысы Азенбек Козукеев кыргыз-кытай чек арасындагы «Торугарт» көзөмөл-өткөрүү пунктуна барды. Иш сапар жол кырсыктарынын алдын алууга жана Бишкек — Нарын — Торугарт унаа жолундагы абалды жакшыртууга багытталган.

Жеринде Азенбек Козукеев оор жүк ташуучу унаалардын айдоочулары менен жолугушту. Бажы кызматкерлеринин жана котормочулардын көмөгү менен Кытайдан (КЭР) келген айдоочуларга Кыргызстанга кирүүдө жол кыймылынын эрежелерин так сактоо зарылдыгы түшүндүрүлдү.

Каршы тилкеге чыгууга тыюу салууга өзгөчө басым жасалды. Чет элдик ташуучуларга маалымат берүү үчүн өткөрүү пунктунда кытай тилиндеги маалыматтык баракчалар илинип, таратылды.

Мындан тышкары, ведомство башчысы бийик тоолуу трассада жасалма тыгындарды жараткан жергиликтүү жана чет элдик айдоочулар менен түшүндүрүү иштерин жүргүздү. Козукеев жол кыймылынын катышуучуларын айдоо маданиятын сактоого, каршы тилкеге чыкпоого жана жолдо үзгүлтүксүз жүрүүнү камсыздоо үчүн бири-бирин сыйлоого чакырды.

«Торугарт» өткөрүү пункту Нарын облусунда, деңиз деңгээлинен 3600 метр бийиктикте, Нарын шаарынан 194 чакырым алыстыкта жайгашкан. ЖКККББ оор жүк ташуучу унаалардын катышуусундагы кырсыктарды азайтуу максатында чек ара аймактарында мындай профилактикалык иш-чаралар улантыларын билдирди.