Евразия экономикалык биримдигине (ЕАЭБ) кирген өлкөлөрдө электрондук навигациялык пломбаларды колдонуу менен ташууларды милдеттүү түрдө көзөмөлдөө башталат. Жаңы эрежелер биримдикке мүчө болгон эки же андан көп мамлекеттин аймагы аркылуу өтүүчү жүктөргө тиешелүү.

Мониторингдин жаңы тутумуна өтүү акырындык менен ишке ашат жана ал болжол менен бир жарым жылга созулат. Бардык процесс үч баскычка бөлүнгөн, анын биринчиси 11-февралда башталат.

Биринчи баскычта навигациялык пломбалар төмөнкү категориялар үчүн милдеттүү болот:

• Санкциялык товарлар, алкоголь жана тамеки: автомобиль же темир жол транспорту менен ташууда (экспорт, транзит жана ЕАЭБ ичиндеги соода).
• Кийим-кече, бут кийим жана техника: бажы транзити режиминдеги автомобиль ташууларында.
• Никотин камтыган продукциялар жана чийки заттар: ЕАЭБ аймагынан автомобиль транспорту менен сыртка чыгарууда (экспорт).

Евразия экономикалык комиссиясынын бажы кызматташтыгы боюнча министри Руслан Давыдовдун айтымында, навигациялык пломбалар — бул логистиканын ачык-айкындуулугун жогорулатуучу жана мамлекеттик органдар тарабынан текшерүүлөрдүн санын кыскартууга мүмкүндүк берүүчү натыйжалуу курал. Келечекте бул технология ЕАЭБ ичиндеги импортту жана товар жүгүртүүнү көзөмөлдөөнүн комплекстүү тутумунун негизи болуп калат.

Ташууларды көзөмөлдөө ишин биримдикке мүчө ар бир өлкөдө дайындалган улуттук операторлор ишке ашырат:

• Кыргызстан: «Мамлекеттик бажы инфратүзүмү» мамлекеттик ишканасы;
• Казакстан: Космостук техника жана технологиялар институту;
• Россия: Санариптик платформаларды өнүктүрүү борбору;
• Беларусь: «Белтаможсервис»;
• Армения: ArmGPS.

Навигациялык пломбаларды колдонуу товарларды ташууда мыйзамдуулуктун сакталышын камсыздоого жана ак ниет ташуучулар үчүн чек арадан өтүүнү жөнөкөйлөтүүгө багытталган.