Айыл чарба министри Бакыт Төрөбаев Жогорку Кеңештин 11-февралдагы жыйынында сугат тутумдарын жаңылоо боюнча маалымат берди.

Министрдин айтымында, тамчылатып жана жамгырлатып сугаруу системасына өткөн дыйкан-фермерлерге 2 пайыздык чен менен жеңилдетилген насыялар берилет. Бул багыттагы насыяларды берүү жакынкы бир айдын ичинде башталат.

Ошондой эле Бакыт Төрөбаев Ысык-Көл облусун толугу менен тамчылатып жана жамгырлатып сугаруу ыкмасына өткөрүү пландалып жатканын белгиледи. Бул чара сугат суусун үнөмдөө аркылуу Ысык-Көлгө куюучу суунун көлөмүн көбөйтүү максатын көздөйт. Министр эгер суунун баары дыйканчылыкка жумшала берсе, көлгө баруучу суунун деңгээли төмөндөп кетерин билдирди. Учурда бул боюнча тийиштүү пландар иштелип жатканы маалымдалды.